COVID-19 vaccine પર કાર્યરત ટોચના રશિયન વૈજ્ઞાનિકનું શંકાસ્પદ સ્થિતિમાં મૃત્યુ

નવી દિલ્હી: કોરોનાની રસી (Corona Vaccine)  તૈયાર કરવાના કામમાં જોડાયેલા રશિયાના એક ટોચના વૈજ્ઞાનિકનો શંકાસ્પદ અવસ્થામાં મૃતદેહ મળી આવ્યો છે. રિપોર્ટ્સ મુજબ 45 વર્ષના વૈજ્ઞાનિક અલેક્ઝાન્ડર સાશા કગનસ્કી (Alexander Kagansky) પોતાના ફ્લેટના 14માં માળેથી નીચે પડ્યા હતા. ઘટના  ઘટી ત્યારે તેઓ ફક્ત અંડરવિયરમાં હતા. 

પોલીસ હત્યા મામલે પણ તપાસ કરી રહી છે અને 45 વર્ષના એક સંદિગ્ધ વ્યક્તિની અટકાયત પણ થઈ છે. કથિત રીતે વૈજ્ઞાનિકના શરીર પર ચાકૂથી હુમલો કર્યાના નિશાન પણ છે. અલેક્ઝાન્ડર સાશા કગનસ્કી બાયોલોજિસ્ટ તરીકે કામ કરતા હતા અને બ્રિટનની એડિનબર્ગ યુનિવર્સિટી સાથે પણ જોડાયેલા હતા. લગભગ 13 વર્ષ સુધી તેમણે સ્કોટલેન્ડમાં કામ કર્યું હતું. 

રશિયન અખબાર Moskovsky Komsomolets ના રિપોર્ટ મુજબ કગનસ્કી કોરોના વાયરસની રસી તૈયાર કરવામાં કામે લાગેલા હતા અને તેમનું મોત અજીબોગરીબ સ્થિતિમાં થયું છે. જો કે હજુ એ સ્પષ્ટ નથી થયું કે કોરોનાની કઈ રસી પર તેઓ કામ કરતા હતા. 

રશિયાની એક યુનિવર્સિટીમાં કગનસ્કીએ સેન્ટર ફોર જીનોમિક એન્ડ રિજેનેરેટિવ મેડિસિનના ડાઈરેક્ટરના પદે પણ કામ કર્યું હતું. રશિયન મીડિયા રિપોર્ટ મુજબ પોલીસનું માનવું છે કે ફ્લેટના 14માં માળેથી નીચે પડતા પહેલા વૈજ્ઞાનિકનો કોઈની સાથે ઝઘડો થયો હતો. હાલમાં જ રશિયન સરકારે તેમને રિસર્ચ માટે એક ગ્રાન્ટ પણ આપી હતી.